FHI har lansert overvakingsapp — fleire er skeptiske

Sist torsdag blei appen Smittestopp lansert for iPhone og Android-telefonar. Appen er utvikla av Folkehelseinstituttet i samarbeid med mellom anna Simula. Appen sporer rørslene til brukaren, og gir varsel på telefonen om brukaren kjem i nærleiken av ein som er smitta av det nye korona-viruset.

Overvakingsappen har blitt kritisert frå fleire hald. Mellom anna stortingsrepresentant Åshild Bruun Gundersen (FrP), som åtvarer mot å installere appen.

Med denne appen gir du myndighetene tilgang til hvor du befinner deg, hvilke personer du snakker med, og hvor lenge du snakker med dem. Vi åpner altså for en overvåkning vi aldri har sett maken til. (NRK)

Dette sa Gundersen i Politisk Kvarter sist fredag.

Ho fekk svar av helseministar Bent Høie, som meiner at Gundesen skaper unødvendig bekymring. Han seier at appen er til for å sjå “hvordan de store folkemengdene beveger seg”, og at “appen ikke overvåker den enkelte”.

At appen ikkje overvaker den enkelte, er ei sanning med modifikasjonar. FHI opplyser om at “dataene som samles inn vil bli lagret med alle detaljene av hvor brukerne har beveget seg, og hvem de har møtt i 30 dager.” (NRK)

Ifølgje Høie er det “en eller to” personar i Folkehelseinstituttet som har krypteringsnøkkelen, og kan lese sporingsdataa til enkeltpersonar.

Bekymringane til Gundersen om at appen opnar opp for meir omfattande overvaking, er nok ikkje grunnlause. I fleire omgangar har styresmaktene i Noreg drive omfattande politisk overvaking av opposisjonelle — spesielt medlemmar i NKP og AKP.

Altså er det nok ikkje Gundersen som har størst grunn til å bekymre seg.

Steinar Nørstebø, tidlegare leiar i Bergen SV, har skrive til Nidaros at han er skeptisk til å installere Smittestopp-appen. Då han var elev ved Ringve gymnas i Trondheim, fekk han oppretta ei “mappe” hos overvakingspolitiet. Grunnen var at han hadde delt ut politiske løpesetlar og tatt ordet på eit allmøte.

Dette var i brevets, fasttelefonens og papirarkivenes dager. Tenk om datidens overvåkere hadde hatt tilgang på alle elektroniske spor vi i 2020 legger fra oss om hva vi gjør, hvilket område mobilene våre er i, hvilke nettsteder vi besøker for å nevne noe. Da hadde det dessverre vært et for kort skritt til overvåkingstilstander i stater med totalitært preg i dag.

Det er ingenting som tyder på at Smittestopp-appen vil bli brukt umiddelbart til politisk overvaking.

Jurist Heidi Beate Berntzen seier til NRK at

Det er betryggende å se at appen ikke skal ha «direkte kobling til politiet», og jeg håper at det også spesifiseres at data ikke under noen omstendigheter vil bli utlevert til politiet eller andre tredjepartsaktører.

Dette er nok likevel ikkje grunn til å senke skuldrane heilt. Teknologien til massiv overvaking av politisk opposisjonelle finst, og om overvakingspolitiet ønskjer å ta han i bruk på eit seinare tidspunkt, er det nok ikkje mykje som står i vegen.

Og det får vanlegvis ikkje offentlegheita vite før det er for seint.

One Comment on “FHI har lansert overvakingsapp — fleire er skeptiske”

Legg igjen en kommentar

Din e-postadresse vil ikke bli publisert. Obligatoriske felt er merket med *